ماشبه لهم    یا مریم اگبالی انذبح

شاب وینحرم     ماغازل اعیونه الفرح

حته ابجماله یختلف       بس ابمحمد ینوصف

مریم سلام الله علی عیسه وحبیبه

من مولده ولمبعثه او لحظه مغیبه

سبحانه من شبه لهم غیره ابصلیبه

سبحانه من خله علی جثه خضیبه

نایم عالثره        یا مریم ابعمر الورد

جل الصوره         مثله بعد ماینوجد

والله ابجماله ینحلف   بس ابمحمد ینوصف

***    ***    ***

لیله انا وفگد الولد یحرگ مهجتی

یا مریم انتی والده مثلی فگدتی

عیسه السما الله ارتفع وانتی انکسرتی

وانه شفت دم رگبته ومالت رگبتی

راسه اعله الرمح     چن گلبی ویا مرتفع

لو مات الصبح      یا مریم اشینفع دمع

ضی الوجه من ینکشف     بس ابمحمد ینوصف

***   ***   ***

اصفر شفت وجه الابو وانی سئلته

گتله یبو الاکبر شکو شنهی اللی شفته

گلی ابن غانم برز واعرف قدرته

هذا ابعشرة الاف انه احسب حملته

یا لیله اندعی     ابنچ یردلچ بلدعا

بدموع ونعی    یا ربی سالم رجعه

وجهه اعله ابنه منخطف     بس ابمحمد ینوصف

انه انغمه اعلیه اوطحت خوفی رعبنی

یا مریم واشعر علی ابگصتی یحبنی

من فتحت عینی شفت شابگنی ابنی

گتله ییمه امروتک لا لا تذبنی

باس ایدی ومشه    وانه ومشی واوگع ونتحب

مایرجع حشه      شاف العساکر تقترب

وکت الکلایف ینعرف   بس ابمحمد ینوصف

***   ***   ***

یا مریم ابنار العطش گلبه تچوه

هذا النهر مایه طفح بس ماتروه

ریجه یبس من الضمه اومن یحچی گوه

مثل القصن فوق المهر شفته ایتلوه

لو شاف النهر   یا مریم اسمع حسرته

ویطیل انظر   چن الرسول ابغربته

واهل الصنم صارو حلف    بس ابمحمد ینوصف

***   ***   ***

دارو علیه من کل کتر و ولیدی وحده

ضربوه علی راسه ونزف حلمی وتبده

نام اعله المهره یالمهر للخیمه رده

غطه الدمه اعیون المهر والشوفه سده

مارد للخیم    تیه طریقه ومارجع

ماعدهم رحم   یا مریم اموذر وگع

والواجه المر والکلف     بس ابمحمد ینوصف

***   ***   ***

یا مریم وگلب الابو اعله ابنه  اشیصبره

خضب لحیته الطاهره من مجره نحره

وتمدد ویاه وضع صدره وعله صدره

چلمت عله الدنیا العفه گلبچ تفسره

رد یحمل علی      للخیمه جابه العمته

ماجابه الی      خایف اموت ابشوفته

والیرشف اریگاه رشف    بس ابمحمد ینوصف

***   ***   ***

بالله تنحن عن علی اوخلنی یمه

ابنی ورید ابراحتی من نحره اشمه

شیبی اصبغنه حمر من هذا دمه

میته عسنی والمشه خل یاخذ امه

یا مریم گمر     کل جسمه طبرات وطعن

لو عیسی حظر      والله یگابلنی ویون

بدر ابتمامه وینخسف   بس ابمحمد ینوصف   

 للشاعر السید عبدالخالق المحنه