امرک وعد     ثارک عهد

یامنقذمن اهل الظلم حکم الشریعه

اطوی الارض     عندک فرض

موعد صلاه الجمعه یم قبر الودیعه

***  ***   ***

امک خزانه حکمه الخالق صدرها

لاذت ورالباب الاجل عفت سترها

عصرت حقد عالحایط الظالم عصرها

واللی هظم ام الحسن چف السطرها

عندک خبر     باقی الاثر

طول الزمن ینزف جرح عین الشریفه

کسر الضلع     باب الدمع

 کل الفجایع صارت من اول فجیعه

***   ***   ***

شجرت حنان المصطفی والرحمه ضلها

محد گبل وعد الاجل امک سالها

یاموقف اعلیها الاشد سبب اجلها

صبر الوصی لو طیحت المحسن طفلها

واللی اشد     واصعب بعد

دار الوحی بابه اندفع بامر الخلیفه

وبعدالغدر    رد یعتذر

ماتغفر اذنوب الحقد های الذریعه

 ***   ***  ***

بضعه محمد فاطمه عدهم امانه

وتمثل اخلاق النبی وعطفه وحنانه

لکن طفو نور الیسد خله مکانه

لا تامل امن اهل الغدر غیر الخیانه

غیر الحقد    لا تعتقد

رحمه گلب تتوقع امن اهل السقیفه

واهل الشیم   عدهم قیم

صاحو علی هو الولی اواجب نطیعه

***   ***   ***

خبرنه عن قصه دفن امک یبنهه

لیش ابجنح لیل الوصی راید دفنهه

رد الودیعه امصوبه ابهمهه وحزنهه

صایر گبرهه ابیا کتر دلینه عنهه

یلمنتظر    عندک خبر

من دفعه الباب الدمه سنو نزیفه

ورب السمه  خص فاطمه

یوم الحساب الک محب هی الشفیعه

***   ***   ***

عجل یمن ثارک فرج جبره ضلعها

خلی البتول ابرایتک تمسح دمعها

ونشدها اصعب یا الم وکثر فجعها

چف الدفع زینبها لو چف الدفعها

سوط المتن   جرح الچفن

لو عالهزل قصه سبی الحره العفیفه

سهم الاحد     وصوابه اشد

منه انطفت عین الگمر فوق الشریعه

زینب وریثت فاطمه الماتت حزینه

یلمهدی تدری اویا گلب طول ونینه

مهیوبه محشومه اجت من المدینه

اوردت سبیه من بعد حامی الضعینه

اجمل صفه    عنده الوفه

لیل اونهار ابغیرته عامر مظیفه

یم النهر   طاح الگمر

للعز منایر صارت اچفوفه الگطیعه

***   ***   ***

اکشف گبر امک یمن ثارک ضمدها

تلگه الاثر من صطرت الباغی اعله خدها

حتی ابگبرها وماتزال اتون بعدها

سهم الی صوب چبدت حسین الضهدها

نحره انگطع   راسه انرفع

فوق الرمح آیه عجب نبضه رفیفه

یبنی صحت   طول الوکت

نوحی عله احسین وعلی ذبحت رضیعه

الشاعر السید سعید الصافی