تسبیح الامل        عن داری من رحل        ودعته بحساسی

شما صلی فرض         کل دعوات الحفظ       تقراله انفاسی

تسهیل امره یومیه        اقره الفاتحه علیه

گصدت کربله      قافله الشمس      تنثرعالارض نور

احبس دمعتی        وتموت السمه      من اتودع البدور

وارث فاطمه            ناجیته مثل       موسی بجانب الطور

اقره ابنظرته       کلمات العذر       گتله یبنی معذور

فردوس العمر   عیشنی عالجمر    وجروحی تبچیله

بدموع الصبر    اتوجه کل فجر       للباری ودعیله

لحفظه ابخالص النیه       اقره الفاتحه علیه

***   ***   ***

الوادم من تحب    تهدی بس ورد     وآنه اختلف یا ناس

اهدیته اربعه      کل واحد علی      یوم الشده ینقاس

والیمشی ابسفر     تتصدق هله     عشت ابهاذه الاحساس

الغالی من رحل     عنه اتصدقت      ببنی الغالی عباس

بعیونی ضوه       ریحانه نینوه    بحزانی تانیته

شیال اللوه    اغله من الهوه      ولاجله ضحیته

بدموعی الحسینیه     اقره الفاتحه علیه

اتذکر امس    قندیل العرش      چان ابمنزلی ایبات

وندار الزمن    لن بیتی صبح    موطن دمعه وآهات

بچفوفی الزمت    سبحه فاطمه   واهدیله صلوات

من اشتاگ اله   انظر صورته    بعیون السماوات

ناموس الدهر    اتنطر بس خبر     من عنده یلفینی

عذبنی السهر     نادیت من القهر     یالزهره غیثینی

اقنت وارفع ایدیه     اقره الفاتحه علیه

***    ***   ***

بس اشتم هوه      وادی کربله      منیه دنیه های

اشگد اتوسلت      یرضه برحلتی    ویگول امشی ویای

گتله امروتک       بس لا انحرم    من خدمتک مولای

تعطش بالدرب      وانه ارکض الک     بیدی شایله المای

یاریت انحسب      قطره من العذب    واتلامس اشفافک

کل نسمه التهب    حگها لو تنعجب     یالغالی بوصافک

یوم الما تمر بیه      اقره الفاتحه علیه

آنه العارفه    وسولفلی علی     بکل الیحدث اعلیه

اتمنیت الحجر     لو طر جبتهه     احضرله واداویه

جسمه لو وقع    عن  حر الشمس     بحجابی اغطیه

ماخلی الشمر       یقطع منحره     ولاحافر یمر بیه

کون اتصوره        من یهوه اعله الثره      وتمدد ابکتره

احضن منحره      واسال عن خنصره         وی زینب الکبره

یم شیبته المدمیه        اقره الفاتحه علیه

***      ***      ***

وعیونه لون        اندل کربله       اوصل لیها بالحال
وبروحی اشتری     احجابات وعبی    واستر بیها العیال

گتله عالاقل     خلینی انچتف      وی زینب بالاحبال

آنه محجبه     ومصیونه علی     توگف بین الارجال

زینب عالهزل     تندب یابالفضل   خدر اختک اتسلب

یاریت الحبل     یجرح چفی مثل   ام الصبر زینب

لمن تمشی مسبیه       اقره الفاتحه علیه

بعد الواقعه    صارت ندبتی     وللمهدی دعائی

کل لحظه التمر    عجل بالفرج     یتعانه ندائی

این الطالب    بدم المنذبح     فی کرب وبلائی

لگطعه منحره     الساعه محشری      ماا ترک عزائی

حته بالگبر     عاشوره من یمر     دمعی یظل یجری

واعلیه نذر   اوقف یم الحشر     والطم علی صدری

للظل جثه مرمیه     اقره الفاتحه علیه

لشاعر کرار حسین الکربلایی